Starlink
E artíkulo aki ta skirbí na ortografia di papiamentu. Lo ta apresiá si por mantené e artíkulo aki na estilo di papiamentu.| Starlink | ||
|---|---|---|
 | ||
 | ||
60 satélite Starlink djis promé ku despliegue dia 24 di mei 2019. | ||
| Funda | 2015 | |
| Fundadó | SpaceX | |
| Pais |  Merka | |
| Zona di operashon |
 Boneiru Kòrsou | |
| Wèpsait ofisial | ||
Imágennan riba  Wikimedia Commons | ||
| [Editá Wikidata] · [Manual] | ||
Starlink ta un ret di komunikashon via satélite di e kompania aerospasial merikano SpaceX. E ta proveé akseso na internet di banda hancho (broadband) pa usadó rònt mundu.
Starlink a kuminsá ofresé servisio komersial na Merka na 2020 i a amplia su kobertura internashonal durante e añanan ku a sigui. Pa yüni 2026, Starlink tabatin mas ku 12 mion usadó rònt mundu.[1]
Desaroyo
[editá | editá fuente]E satélitenan di Starlink ta wòrdu desaroyá, fabriká i operá pa SpaceX na su instalashon na Redmond, Washington.[2] E desaroyo di e sistema a kuminsá na 2015, i e promé prototiponan di satélite a wòrdu lansá dia 22 di febrüari 2018.[3][4] Na mei 2018, SpaceX a kalkulá ku e gastu pa diseñá, konstruí i desplegá e konstelashon di Starlink por lo ménos lo alkansá US$10 bion.[5]
Starlink ta usa un ret di satélite den órbita rònt di planeta Tera, konosí na inglés komo Low Earth Orbit (LEO). E ret a bira un parti importante di e negoshi di SpaceX. Pa fin di 2025, Starlink a generá aproksimadamente US$11,4 bion na entrada i US$4,4 bion di ganashi operashonal.[1]
Ret di satélite
[editá | editá fuente]Starlink ta konsistí di un konstelashon grandi di satélite den órbita. Na fin di yüli 2026, e sistema tabatin 10.876 satélite den órbita, loke a hasi SpaceX e operadó di satélite mas grandi na mundu.[6]
E outoridat regulatorio merikano, Federal Communications Commission (FCC), a otorgá pèrmit pa e operashon di 19.427 satélite Starlink. Ademas, te ku fin di 2022, SpaceX a presentá un solisitut pa lisensia pa 22.488 satélite adishonal.[7][8] E kantidatnan aki ta ilustrá e eskala di e proyekto, ku ta muchu mas grandi ku e kantidat di satélite lansá durante e promé seis dékada di e era espasial.[9][10]
E konstelashon grandi a trese preokupashon entre astrónomo i otro investigadónan. E lus reflehá pa e satélitenan por interferí ku opservashonnan astronómiko, miéntras ku e oumento di opheto den órbita ta kontribuí na preokupashon tokante kongestion orbital i e riesgo di bòksmentu den órbita.[11]
Servisio
[editá | editá fuente]Starlink ta ofresé su servisio via un antena di satélite ku ta konektá ku e ret di satélite i e aparato di e kliente. E sistema ta permití akseso na internet sin e nesesidat di un konekshon físiko via kabel te na e edifisio di kada kliente.
Internet via satélite ta un alternativa pa habitante i negoshi den áreanan kaminda konekshon via kabel òf otro infrastruktura di telekomunikashon ta limitá òf no ta disponibel. E por fungi tambe komo un alternativa durante interupshon di otro servisio di telekomunikashon. Esaki ta relevante pa islanan chikí i áreanan alehá, kaminda konstrukshon di infrastruktura terestre por rekerí invershonnan grandi.[12] Otro konsiderashonnan den su uso ta su velosidatnan altu, konekshon mas stabil, i fleksibilidat.[13]
Ademas di su uso residensial i komersial, Starlink ta proveé konektividat durante buelo pa diferente kompania di aviashon. Pa aplikashonnan gubernamental i di seguridat nashonal, SpaceX a desaroyá un division militar bou nòmber di Starshield.[14] E ret di Starlink ta wòrdu usá dor di Ukrania den e guera kontra Rusia pa kontrolá drònnan di atake, defensa i di suministro.[15][16]
Servisio den Karibe Hulandes
[editá | editá fuente]Dia 7 di òktober 2026, gobièrnu di Kòrsou a otorgá un konseshon pa e servisio di internet via satélite di Starlink. E outorisashon ta amplia e kantidat di proveedónan di internet ku por ofresé servisio lokalmente.[17]
Anteriormente, na fin di 2025, Rijksinspectie Digitale Infrastructuur (RDI) di Hulanda a otorgá un konseshon di 15 aña pa e islanan Boneiru, Sint Eustatius i Saba.[18][13]